7 декабрь Башҡорт филологияһы факультетында "Тулҡын" әҙәби-ижад түңәрәге Башҡортостандың халыҡ шағиры, С. Юлаев премияһы лауреаты, атҡаҙанған мәҙәниәт хеҙмәткәре - Ҡәҙим Абдулғәлим улы Аралбай менән шиғри кесаҙна үткәрҙе. Быйыл шағирҙың әҙәбиәт өлкәһендә хеҙмәт итеүенә 60 йыл.

Яуаплы урындарҙа эшләү менән бергә ул башҡорт шиғриәтенең йөҙөн һәм ҡеүәтен билдәләүсе шағир булып ижад итә. Уның "Ҡаратау тотҡоно", "Утлы кисеүҙәр", "Батыр яраһы", "Аҡ тирмә", "Һөйөүем йондоҙо", "Әле һуң түгел" , "Мәслихәт", "Рух яҙыуы", "Таналыҡ тауышы" һәм башҡа китаптары төрлө телдәрҙә нәшер ителгән.

Ҡәҙим Аралбай студенттарға тормош юлын, эшмәкәрлеген һөйләне, шиғырҙарын, поэмаларынан өҙөктәр уҡыны. Бигерәк тә Шәйехзада Бабичҡа, Рәми Ғариповҡа арналған шиғырҙары тыңлаусыларҙың иғтибарын йәлеп итте.

Сара аҙағында "Тулҡын" берекмәһенең етәксеһе Әлибаев Зәки Арыҫлан улы һәм факультеттың деканы Хөсәйенова Ләйлә Миҙхәт ҡыҙы күренекле шағирға рәхмәт һүҙҙәрен еткерҙе.

Был осрашыу студенттарға ыңғай тәьҫораттар ҡалдырҙы, илһамландырҙы һәм рухи аҙыҡ булды.