19 февралдә Башҡорт филологияһы факультетында билдәле яҙыусы, журналист Рәзинә Зәйнетдинова-Урманшина менән Халыҡтар берҙәмлеге, ҙур һәм татыу ғаилә йылына, Халыҡ-ара телдәр көнөнә арналған йылы осрашыу үтте. 

Сара барышында автор студенттар менән үҙенең ижади донъяһы, китаптарының яҙылыу тарихы һәм илһам сығанаҡтары тураһында уртаҡлашты. Осрашыуҙың төп темалары:

— Рәзинә Гильман ҡыҙы үҙенең әҫәрҙәрендә ниндәй темалар күтәреүе һәм идеяларҙың ҡайҙан килеүе хаҡында һөйләне.
— «Шоңҡар» журналында өлкән мөхәррир булып эшләү дәүерендәге ҡыҙыҡлы тәжрибәһе менән бүлеште.
— Автор Ҡаҙағстан Президентының атаһы, танылған яҙыусы Кемель Токаевтың китабын рус теленән башҡортсаға тәржемә итеү нескәлектәре тураһында һөйләп үтте.

Осрашыу йәнле аралашыу форматында үтте, студенттар яҙыусынан үҙҙәрен ҡыҙыҡһындырған һорауҙарға яуап алды. Ижади кисә һәр кемгә илһам һәм рухи аҙыҡ бирҙе!